போலியான O/L மற்றும் A/L பெறுபேறு சான்றிதழ்களை வழங்கிய குழு கைது!!

 இலங்கை பரீட்சைகள் திணைக்களத்தினால் வெளியிடப்பட்ட க.பொ.த சாதாரண தர மற்றும் உயர்தரப் பரீட்சை பெறுபேறுகளைப் போன்று போலியான பரீட்சை பெறுபேறுகளை உருவாக்கிய நான்கு சந்தேகநபர்கள் கேகாலையில் கைது செய்யப்பட்டுள்ளனர்.

கேகாலை குற்றப் புலனாய்வுப் பிரிவினருக்கு கிடைத்த இரகசியத் தகவலின் அடிப்படையில் மேற்கொள்ளப்பட்ட சுற்றிவளைப்பைத் தொடர்ந்து இந்தக் குழு கைது செய்யப்பட்டதாக பொலிஸார் தெரிவித்தனர்.

இந்தச் சோதனையில் போலி தேர்வுத் தாள்களை உருவாக்கிய ஒருவரும், அவருக்கு உதவிய மூன்று பேரும் கைது செய்யப்பட்டனர்.

சந்தேகநபர்கள் 21 வயதுக்கும் 55 வயதுக்கும் இடைப்பட்டவர்கள் எனவும், ஹக்கஹின்ன, ஹெட்டிமுல்ல மற்றும் அலபலவ ஆகிய பிரதேசங்களைச் சேர்ந்தவர்கள் எனவும் தெரிவிக்கப்பட்டுள்ளது.

இந்த சோதனையின் போது போலி பெறுபேறு தாள்கள், கம்ப்யூட்டர், ஸ்கேனர், போட்டோ பிரிண்டிங் மிஷின், செப்பு சீல் ஆகியவற்றை பொலிஸார் பறிமுதல் செய்துள்ளனர்.